Sementamos políticas de futuro na área de Turismo

Mugardos é un dos municipios con maior potencial turístico das Rías Altas. Mentres que a maioría de concellos necesitan investir moitos cartos na súa imaxe exterior para atraer visitas, nós contamos cunha fama de serie de ser unha vila de “bo comer”. Pero o que en principio é unha virtude podería converterse nun problema se provocaba estancamento, porque Mugardos nin ten aínda consolidado un “produto turístico” como tal, nin estaba tendo presenza nos circuítos comerciais.

O nivel de desemprego en Mugardos (como no resto da comarca) fai que sexa moi importante aproveitar as oportunidades para ofrecerlle un futuro no municipio á mocidade. Xa desde a campaña electoral previa ás municipais ICM fixo fincapé nisto, en levar a “marca Mugardos” polas feiras de turismo, e por ter un plan a longo prazo para desenvolver o sector hosteleiro.

Comezamos a dar pasos cara a consolidación dunha marca propia (“Mugardos, o sabor do mar”) regulando o seu uso e lanzando novas propostas como o Metrominuto, que son tamén a aposta por un modelo urbano sostible que valorice a nosa fachada marítima. Desa mesma visión nacen as visitas guiadas polo peirao.

Sigue lendo

Share

Dimos un paso adiante na rehabilitación dos cascos antigos de O Seixo e Mugardos

Os cascos antigos de O Seixo e Mugardos están, aínda, entre os mellor preservados de Galicia, salvándose, en boa parte, dunha especulación urbanística que fixo desaparecer moitas das vivendas tradicionais nos pobos costeiros. O Seixo e Mugardos teñen a súa propia identidade. Rezouma, urbanisticamente, a historia mariñeira que teñen os dous núcleos.

A reapertura da Oficina de Rehabilitación de Mugardos, logo de máis de 3 anos pechada, é un paso importante para a rehabilitación e reurbanización destes dous cascos antigos. Un total de 115.000 € repercutirán nos proxectos da veciñanza, chegando ata os 11.000 € para cada vivenda.

Para conquerir esta reapertura traballamos en ICM desde a Concellería de Urbanismo, entre outras cousas, poñendo ao día o estudo dos inmobles que detectou 151 edificios en estado de conservación regular, malo ou moi malo. O diálogo coa Xunta de Galicia foi permanente para que a oficina fose unha realidade. Sabemos o complicado que pode ser que xa no primeiro ano se inicien grandes rehabilitacións, por iso é moi importante darlle continuidade e facer unha labor de futuro para que Mugardos e o Seixo recuperen a súa paisaxe urbana tradicional.

Sigue lendo

Share

Mugardos experimentou en ano e medio un grande impulso dos comedores escolares

Os comedores escolares serven a nais e pais para conciliar a súa vida laboral e familiar, ademais de axudar a moitas familias con dificultades sociais e económicas. Sen embargo, cada vez son máis as ANPAs do país que demandan un maior peso dos criterios educativos e o emprego de alimentos de tempada e proximidade á hora de contratar as empresas de cátering.

En xaneiro do 2016 ICM preguntaba en comisión ao goberno do PP polo borrador do prego de contratación do comedor escolar do CEIP Unión Mugardesa. A nosa intención era incorporar criterios educativos e de achegamento do servizo ás familias. Pero, tras informarnos que estaban ultimándoo, o que a concelleira Begoña Roldós presentou un mes despois en comisión foi un documento xa aprobado pola Xunta de Goberno, sen terse sometido nunca a debate, e que non recollía os criterios que nós pretendiamos.

Cando asumimos a área de Educación, en agosto do 2016, Mugardos contaba cun único comedor escolar de 58 prazas e dúas monitoras que daban de xantar e que tiña lista de agarda. Os obxectivos daquela eran levar o servizo tamén ao CEIP Santiago Apóstolo de Franza, amplialo aos almorzos –que axudarían especialmente a nais e pais que se incorporan ao posto de traballo máis cedo– e cumprir un ratio de 16 alumnas/os por monitora, na liña das demandas dalgunhas federacións de ANPAs. Precisábamos, para iso, aumentar o plantel de dúas a tres monitoras.

En menos de un mes desde a chegada do novo goberno, o Concello de Mugardos puido anunciar o servizo “Madrugamos!” para o comezo do curso 2016-2017. Durante o mesmo curso conseguimos ademais que a empresa concesionaria enviase tres monitoras. Conseguimos tamén reducir o número de conflitos entre o alumnado cun seguimento constante por parte da concelleira de Educación, que visitou case semanalmente o centro.

Ao mesmo tempo, comezaron as xestións para facer realidade o comedor de Franza, para o que se mantiveron conversas coa propia dirección do centro, a ANPA e o delegado territorial de Educación. Así, desde comezos do curso 2017-2018 o Santiago Apóstolo ten xa o seu propio comedor escolar con servizo de xantar de 20 prazas, o que tamén resolve a lista de agarda do Unión Mugardesa.

Sigue lendo

Share

Moito máis que a reforma do Mercado Municipal

En agosto do 2016 asumimos a xestión do Mercado Municipal de San Telmo co propósito de corrixir o seu lento declive das últimas décadas. Tiñamos claro que a perda de clientela tiña un transfondo que non se podía resolver con pequenos arranxos puntuais. A diferenza doutros casos nos que os edificios están case abandonados e presentan eivas graves, en Mugardos investiuse na última década preto de 500.000 € en múltiples reformas sen unha visión clara de futuro, pero que evitaron o deterioro estrutural. O que precisabamos era algo máis, era reconectar o Mercado coa hostalería, un dos piares económicos de Mugardos.

A propia Xunta publicaba meses antes o seu Plan de Mercados Excelentes de Galicia 2016-2020 no que marcaba a folla de rota para que as prazas de abastos e mercados atopasen o seu lugar nun contexto que xa non é o de hai 50 anos. A transformación pasa por un cambio de concepto, máis que por reformas materiais. Deixar de competir coas grandes cadeas de supermercados e atopar o seu propio espazo.

Tívose en conta a tódolos sectores involucrados

Así é como en xullo do 2017 o goberno municipal contrata o Plan de usos do Mercado de San Telmo. A partires de entón comeza un estudo detallado da súa situación, das súas necesidades, da visión que del teñen non só as praceiras, senón tamén a hostalería, agricultoras locais, a confraría de pescadores e mariscadoras e ata a propia clientela.
Segundo avanzaba o estudo as pezas comezaban a encaixar. A hostalería advertía da falta de oferta, da dificultade para mercar froitas, verduras ou marisco mugardeses. Mais recoñecía a importancia que ten hoxe en día na restauración o produto local. A confraría destacaba a alta calidade do seu marisco (ostra, ameixa e berberecho), mais a falta dunha depuradora fai que todo o produto se comercialice fóra. Rechamante era tamén a escasa produción da horta (apenas un produtor local), mais aí abríase unha xanela de oportunidade para o Ciclo Formativo de Agroxardinaría e Composicións Florais.

Sigue lendo

Share

Asemblea Xeral do 21 de novembro de 2017

Na asemblea celebrada hoxe, a Iniciativa Cidadá de Mugardos dou por roto o Acordo de Goberno do que formaba parte. A pesar de ter proxectos importantes en marcha, e outros que se van materializar nos próximos meses, a metodoloxía de traballo e de toma de decisións de forma unilateral por parte da alcadía, lévanos a tomar esta dura decisión.

A ilusión por dar un xiro na forma de facer política en Mugardos e implicar á veciñanza nas decisións que forman parte do presente e futuro da nosa vila, non ten cabida cos métodos da vella política, veuse co goberno de Juan Domingo Deus e nos últimos meses coas decisións internas e públicas de Pilar Díaz.

O camiño segue para Iniciativa Cidadá de Mugardos, e será traballando para que o noso proxecto de pobo sexa realidade. Proxectos como a rehabilitación do Cine Zárate, dos Cascos Antigos do Seixo e de Mugardos, un Mercado de Abastos totalmente renovado e a tan ansiada Participación Cidadá cuns primeiros Orzamentos Participativos pioneiros no noso Concello están xa listos para que sexan realidade.

Como xa demostrou ICM, tanto na oposición como no goberno, o noso proxecto político é propositivo. A posición política será de continua colaboración para chegar a consensos sempre que haxa vontade de diálogo.

En Mugardos, a 21 de novembro de 2017.

Share

Peonalización do peirao de Mugardos

Dende os primeiros pasos da ICM e tal e como recollemos no noso programa electoral, o desexo de fomentar a transformación do pobo pensando na veciñanza de xeito que permita as relacións sociais, é patente para nós. Queremos ver as crianzas xogando nas rúas e que poidan ir soas ás escolas. Queremos un pobo seguro, no que as nosas persoas maiores poidan desenvolverse sen atrancos nin barreiras arquitectónicas.
Queremos que Mugardos sexa un lugar de referencia como pobo amigable e con calidade de vida.

É necesario limitar a invasión dos coches nos espazos públicos e apostar pola concentración das zonas de aparcamento máis que na dispersión, unha localización que permita tanto o achegamento aos puntos de interese como que disuada do uso do vehículo privado. Regular, reordenar e calmar o tráfico, limitando a velocidade no entorno urbano a 30 km/h, dando prioridade ao transporte público e aos medios non contaminantes, e peonalizar os contornos de valor turístico, comercial e histórico-artístico son temas primordiais.
Todo de forma progresiva e co consenso dos sectores afectados.

A peonalización do peirao de Mugardos será unha realidade os meses de xullo, agosto e setembro, nun primeiro paso para poder gozar de Mugardos a pé.

Entre todas debemos cambiar os hábitos, poñer da nosa parte e pensar no conxunto. Rúas nas que poder deixar as crianzas xogar, beirarrúas e espazos accesibles nas que as persoas con mobilidade reducida non encontren continuos atrancos pasan por todas nós, un Concello de Mugardos amable e sociable pasa pola veciñanza.

Share

Os primeiros orzamentos con investimento en participación cidadá

O Goberno Municipal de Mugardos ven de presentarlle aos grupos da oposición o proxecto de Orzamento Municipal do 2017, unha ferramenta fundamental para poder desenvolver un proxecto político sólido. Serán os primeiros en dotar dunha planificación presupostaria ao noso Concello, logo do ano en branco que supuxo o goberno de Juan Domingo Deus. Serán tamén os primeiros orzamentos da Iniciativa Cidadá de Mugardos e os primeiros en contar con investimento en procesos participativos.

En liñas xerais, Mugardos mantense como un dos concellos do seu tamaño con maior implicación no benestar social, tanto en servizos asistenciais como de promoción social e cultural, cun importante financiamento ao movemento asociativo, abandoado á súa sorte polo anterior goberno do PP. Mais incorporarán novas partidas que porán en marcha o concurso de ideas para realizar unha actuación integral no centro de Mugardos, creando espazos verdes e dotándoo dunha nova biblioteca municipal, a actualización do estudo da edificación do casco antigo da vila de Mugardos, e a posible recuperación da Oficina de Rehabilitación, a ampliación da rede de marquesinas para o transporte público, a creación dun comedor escolar no colexio Santiago Apóstolo de Franza, xunto con melloras nas instalacións do Unión Mugardesa e un salto importante na modernización tecnolóxica dos servizos municipais.

O proxecto de Orzamento Municipal presentado debuxa tamén un novo escenario na relación da administración local coa veciñanza. Neste sentido, suporán un paso adiante o arranque do proceso de Orzamentos Participativos nos que o conxunto da cidadanía achegará, analizará e determinará sobre as súas propias propostas de investimento nas parroquias. Xunto con eles, a imprescindible renovación do Mercado de San Telmo escoitará tamén aos sectores implicados no seu futuro. Non rematará aquí a implicación veciñal, que será consultada para o desenvolvemento do primeiro Plan Estratéxico, un documento fundamental para definir un proxecto común de municipio entre concello e cidadanía.

Desde Iniciativa Cidadá de Mugardos celebramos este principio de acordo acadado con EU e BNG, e que xa está a disposición de PP e PSOE.

Share

A Biblioteca que Mugardos merece

Logo do paso de nove corporacións municipais desde a chegada da democracia a Mugardos, a creación dunha nova e verdadeira Biblioteca Pública Municipal fíxose un dos temas centrais neste décimo mandato 2015-2019.

En Iniciativa Cidadá de Mugardos apostamos por ela xa no noso programa electoral, e cando en outubro do 2015 o Pleno debateu priorizar que a Guardia Civil ficase en Mugardos, ofrecéndolle incluso o edificio do Apelón, mantivémonos á marxe, xunto co BNG, porque malia preferir que ficase no Concello, non queriamos que fose cedendo un edificio que para nós era o lugar ideal para instalar a nova Biblioteca. Fomos minoría (8 fronte a 5).

Seis meses despois, en abril do 2016 tentamos, de novo xunto co BNG, que o Pleno se posicionase a favor de destinar o edificio do Apelón a Biblioteca e non a Guardia Civil. A nosa minoría volveuse ratificar, con só 5 votos a favor (ICM + BNG) e 7 en contra (PP + EU). O Apelón como “opción A” esvaíase.

Aínda conscientes da minoría á hora de levar a Biblioteca ao Apelón, cando EU, ICM e BNG chegamos a un acordo común para gobernar, a Biblioteca seguiu sendo unha prioridade, que se plasmou nun documento que procura facela realidade antes do 2019. En agosto EU, ICM e BNG asumimos o goberno e desde entón traballamos en poder dispor desa “opción B” que poida darlle a Mugardos a Biblioteca que leva décadas demandando. O Goberno Municipal solicitou un informe técnico dos requirimentos dunha nova Biblioteca á bibliotecaria municipal, e consultou cos redactores do novo PXOM as alternativas sobre as que seguimos traballando.

Sigue lendo

Share